العزيزه (...........)
بصدر رحب أتلقى قرارك بأنك سايباني وماشيه
بدون ضغائن، رغم اني مش متفهم اسبابك، لكن متفهم موقفك.
كلام كتير حكيتيه، وكتبتيه في رسايل، عن الالتزام والدين والعفه، وعن ضميرك وعن طريقك وعن طريق ربنا..
وانا فعلا متفهم
لانك يا عزيزتي تلميذه..
لانك ياعزيزتي لسه في الأيام اللي محدش فيها بيفارق حد غصب عنه، اللي ما فيهاش اصحاب بيسافروا، ولا حد مضطر يسيب اهله
تلميذه لسه فيكي تطرف التلاميذ، اه أو لأ.. أبيض أو اسود
ولسه بتستخدمي الكلام اللي من نوع، انا بارسم حياتي، انا عارفه طريقي، أنا ثابته على مبدأي
وانا مش عجوز، انا بس على بعد سنتين في دنيا مابعد التلمذه. طبعا حاجه مش حلوه ان الواحد يفقد حماسه، لكن مفيد انه يزداد حكمه
برضه حاجه مش حلوه ان الواحد يخل بثباته، لكن مفيد انه يفقد تطرفه
واكيد مش حلو ان الواحد تربطه الحياه بناس غير احبابه، لكن نعمه انه يتعلم يقدر الصحبه
وانتي ياعزيزتي تلميذه، تلميذه لما بتحبيني من غير يهمك تفاصيل..
وتلميذه يوم ماسبتيني في عز حبك وكلك يقين انك هتقابلي واحد انسب..
سقيا لعهد التلمذه
###########################
كلمات صلاح جاهين وألحان كمال الطويل
No comments:
Post a Comment