يعني ايه بزلومتك

صباح الخير
ناس كتير بتستخدم كلمة بزلومتك في بعض المواقف، لكن انا يدهشني الناس اللي مش بيستخدموها
خليني انقل لكم فكرتي عن معنى بزلومتك
الفيل، أبو زلومه بطبيعة الحال، بتلاقيه طيب كده وغلبان، سليم النيه دايما، نقي السريره
لكن عنده ميزه مش موجوده في أي كائن آخر، وهي كما قد تكون خمنت، الزلومه، ليه الزلومه ميزه..؟ لأنها ممكن تخليه يبقى موجود في مكان هو جسمانيا مش موجود فيه. يعني تخيل مثلا قردين قاعدين على فرع شجره ف الغابه، قرد وقرده عشان الضروره الدراميه، والقرد بيناغش قردته وبيناولها موزه مقشره، ويمكن يتلفت حواليه يمين وشمال، ولما يتأكد انه لوحده، ويتمتع بالخصوصيه الكافيه لقرد مع خطيبته، يحاول يخطف له بوسه. لكن الفيل - أبو زلومه - يتدخل، مش عشان اي حاجه غير انه ياخد الموزه
لاحظ ان الفيل ماكانش موجود معاهم، ومع ذلك فجأه نلاقيه ف النص، بيأثر وبيتفاعل وبيغلس، بزلومته
وهو ده مفهوم الزلومه بالظبط
الناس اللي بتتدخل وتغير وتعطل وتقرف وتغلس عليك حياتك وهم غير مدعوين، بل وهم غير موجودين، ناس بتتدخل بزلومتها، تبقى عايز تشخط فيه وتقول له غور بزلومتك، او اقعد بزلومتك، او خليك مكانك بزلومتك، او تقولهم بزلومتك وخلاص
الآن نعرف يعني ايه بزلومتك
نهارك سعيد

أتاريه الفيل أبو زلومه عمال يرقص ف الأدغال - سيد الملاح