سامحني النوبه دي

- لسه زعلان مني؟

- اه

- طيب انا اسفه

- لأ

- مايبقاش قلبك اسود

- لأ انا زعلان

- طيب أصالحك

- طيب صالحيني

- طيب اجيبلك ايه اصالحك بيه

- ممممم

- قول اي حاجه

- عايز شوكولاته.. المثلثات الكبيره

- توبليرون

- ايوه هي دي

- بسيطه

- وعايز كاس شمبانيا

- صعب

- اهو بقى

- طيب أحاول.. ايه تاني

- عايز كلب

- ماشي

- وعصفوره

- هممممم

- وشجره عمرها ميت سنه، فيها ورد وضل

- ماشي

- ومرجيحه، وحد يمرجحني، وحد أمرجحه

- طيب

- وشقه كبيره، فيها شباك بيشوف البحر وشباك بيشوف النيل

- يا سلام

- بتشوف الشمس بتطلع من البحر وبرضه بتشوف الشمس بتغرب في البحر

- عادي

- وعايز أصحى متأخر و برضه ألحق الشروق

- طيب

- وحضن يساعني، وحضن يساعه حضني

- بلا قلة أدب

- اسمعي بقى

- طيب قول

- وعايز حب، عايز واحده بس تحبني، وعايز كل الناس يحبوني، وعايز فلوس قليله وعايز رضا كتير، وعايز إضاءه كويسه وعايز ضلمه محكمه

- بس كده

- وعايز هدوء تام لكن محتاج شوية ونس

- مفهوم مفهوم

- وعايز سرير كبير

- دانت كلك شبر في شبر هتعمل ايه بسرير كبير

- هاشاركه.. مالكيش دعوه انتي

- ماشي.. ايه تاني

- عايز اتفسح

- افسحك

- عايز دفا وزوجه وسفره وأكل سخن

- مقدور عليها

- وعايز صحبه دايمه وعايز خصوصيه

- ايه كمان

- عايز سينما ومسرح، عايز اتفرج لوحدي وعايز ناس تتفرج معايا

- ماشي

- وعايز اكون موهوب، شاعر أو كاتب

- تكون موهوب

- موهوب موهوب مش نص نص

- ياسلام عليك

- وعايز عمر طويل.. وعايز أموت في سريري من غير ما اكون عيان

- طيب يعني لو وعدتك اني هاجيب اللي نفسك فيه، هاتصالحني؟

- لازم اتمم على كل حاجه بنفسي الأول

- ياسلام على دلعك