Sunday, September 9, 2007

جلّ من سوّاك

قدُك المياس يا عمري
ايقظ الاحساس في صدري
انت احلي الناس في نظري
جلّ .. من سواكَ يا عمري
__
مّداح القمر - محمد حمزة
---------------------------
################
مش عارف ليه عبد الحليم مصمم يقولها " أدك" المياس .. مع انها "قدك" ؟ (اسمع الاغنيه كده عند الدقيقه 11)
انا متأكد ان المؤلف كان هيوطي يبوس رجل عبد الحليم عشان يقولها قدك .. بس تلاقي عبد الحليم قالك بس قدك ده هتبقي صعبه علي الناس ومش هيفموها انا هقولها أدك .. المؤلف يقوله انت مش واخد بالك مفيش حاجه اسمها أدك، اصلها جاية من " قد" يعني عود ، لو اي حد بيفهم سمعك بتقول أدك هيجيله مغص في ودانه إن مجلوش جرب اساسا .. عبد الحليم طبعا يضحك بثقه ويقولك يا عم هو حد فاهم حاجه، متقلقش .. المؤلف يقوله حرام عليك ده احسن حته في الاغنيه .. ده انا اصلا الفت البيتين دول وبعدين كتبت عليهم بقية الاغنيه .. عبد الحليم يقوله ايوه طبعا ماهو علشان كده انا عايز اقولها بطريقه تخلي الناس تفهمها وتستمتع بيها ... المؤلف يقوله طيب خلاص انت قولها أدك والكورال يقولها قدك، عبد الحليم يقوله لأ طبعا انت مش فاهم حاجه، كده الجمهور يتلخبط، ويسأله هو مين اللي هيغني انا والا انتَ المؤلف يقوله انتَ، يسأله تاني.. الناس جايه تسمع غنايا ولا شعرك، المؤلف يقوله لأ جايين يسمعه غناك.. عبدالحليم يحط رجل علي رجل ويقوله خلاص يا حمزة انا والكورال هنقولها أدك ... المؤلف الغلبان طبعا مقدرش يعمل حاجه وخرج وهو يلملم اذيال الخيبه و من ساعتها وهو ياعيني مش قادر يسمع الأغنيه اصلا، وكل ما حد يجي يقولها أدك قدامه يرجع البيت ويعيط ساعتين .. ولومرّ علي سبيل الحظ الغابر جنب راديو بيذيع الأغنيه، وغواه شيطانه انه يقف ويسمع الكلام - اللي هو مألفه - تلاقيه بعد ما بيسمع "أدُك" ودانه بتوجعه تلات شهور ويضطر يروح لدكتور انف واذن وحنجره عشان ينضفها ويعالجها.
والمصيبه بقه لو واحد من الكورال مثلا طلع بيفهم او متذوق للفن، وانتهز فرصه ان استاذ حمزه بيحضر البروفه وجاه وقاله ياااه يا استاذ حمزه الاغنيه فوق الهايله، والاستاذ حمزه يتبسط وينشرح، فتلاقي الراجل يقوله بس انا عندي تساؤل "هي مش احسن ان احنا نقول قدك بدل أدك .. انا يعني كنت بقول انها جاية من" قد" يعني عود .. انت طبعا حضرتك ادري"، ساعتها طبعا الاستاذ حمزه بيكون في حاله غريبه متتوصفش، فيه حته في قلبه كانت بتقول يمكن فعلا محدش يحس بيها يمكن محدش يسمعها، كان نفسه فعلا يكون هو اللي محبكها زيادة. بس للأسف اللي خايف منه حصل، طبعا تلاقي الاستاذ حمزه رفع راسه وبص للراجل (غالبا الراجل ده هيبقي في منتصف الاربعينات واقرع ولابس نضاره وبيحب الشعر) يبصله الاستاذ حمزه ويقول لنفسه ااه هو ده اللي بيفهم اللي ودانه وجعته .. ويجيله احساس بالضعف وقلة الحيله يخليه يكبر عشر سنين وهو قاعد علي الكرسي .. وعشان تكمل يكون عبد الحليم شغال ورا في البروفه .. ويروح ملعلع وقايل أدك المياس .. ويرد عليه كورال البنات أدك المياس .. وحمزة يبص للراجل الاقرع اللي بيفهم (اللي طبعا هيكون مبتسم ابتسامه تفهم منها علي طول ان هو متعبد في معبد اللغه العربيه وواحد فاهم حقيقي وعنده احساس بجد) ... يا عيني علي حمزه المؤلف الغلبان يسمع اغنيته بتغتصب ورا .. ويبص للراجل .. ويلاقي نفسه عاجز .. وعبد الحليم يرجع تاني ويقول أدك .. وحمزه يبص يلاقي كل الناس حواليه بتقول أدك أدك أدك أدك ... ويصاب بحالة اغماء مفاجئ ..
غلبان يا وليدي ... انا حاسس بأحساسه، بالظبط زي ما تكون انت لابس قميص ابيض .. ابييييييييض اوي ... وجالك واحد غلس ..... غلسسسس اوووي .. وقالك ايه القميص الحلو ده .. بس عارف يبقي احلي لو حطيتلك هنا نقطه حمره صغيره .. وانت لسه بتقوله لأ لأ ده قميصي انا .. انا اللي شاريه وانا اللي لابسه .. تلاقيه طلّع داوية الحبر وراح لاطعلك نقطه حمره، هي صغيره فعلا بس انت من بعدها مبتبقاش شايف غيرها في القميص، ما هو القميص ابيض وده نقطه حمره، وبتحس طبعا ان اي حد معدي مبيبصش علي القميص ... بيبص علي النقطه الحمره اللي علي القميص ... وحتي لو كانت النقطه صغيره اوي ومش باينه برده مش هتبص علي حاجه تانيه غيرها .. يجي واحد صاحبك يقولك ايه القميص الحلو ده تقوله ااه بس النقطه الحمره ده مش انا اللي حاطتها ... تبقي نفسك تقطعها .. تمسحها .. تشيلها من قلب القميص ... تبقي ماشي وحاسس انك شايل عارك بايدك ... وتحط القميص في الدولاب وكل شويه تطلعه وتبص عليه وتقول والله قميص حلو اوي .. بس هي النقطه الحمره اللي عليه لو اقدر بس ... وتبص لفوق وتقول بحرقه بزلومتك

No comments: